In´n Schönbargsmoor, an´n Weg vun Westervees na Brockel, dor liggt de Goldkuhl *). In de Johannisnacht hett dat Gold jümmer brinnt; aber wenn sik dat eener halen wull, dann füll üm dat Gold jümmers as Sand wedder von de Schüffel.
Eenmal is dar jüs in de Johannisnacht de ohle Imker Peter vörbikomen. De har sik all girn mal´n Piep ansteken, wenn he man Swöfelsticken bis sik had ha. As he dat dar in de Kuhl gnistern seeg, wör em ja holpen; he stopp sik sein Piep vull Toback unk reg se denn mit een van der gleunigen Köhl dein in´n Gang. An´n annern Morgen har he een Louisdor in de Piep.
Daar is mal een vun de Westerveeser Schepers, as he up Johannisabend lat mit sein Schap na Hus dreef, bi kommen un hett de Köhl mit sein Schapsschüffel utenanner smeten. Annern Dags künn he de Louisdors in de Heid upsöken.
Naher sünd se noch vaken in de Johannisnacht na de Goldkuhl wesen; se künnen dat Gold aber nich mitkriegen.
Later hett de Scheeper ut´n Ohlenbostel **) an Schnitjers Bur mal vertellt, dat man dat Gold blos alle söben Johr eenmal in de Johannisnacht mitkriegen künn. Ween een dat jüs dröp un dat Gold in´n Ammer kreeg, dröf he nix seggen, bet he dormit ünner Dak wör.
Schnijers Bur un Frers Bur habt dat denn ja ok richtig fertig kregen; se funden eenen ganzen Grapen vull Gold un teugen dormit los. Dar löp Hinkebeen dat Gössel acht jüm her un reup jümmer: “Schüll ik´t woll kriegen, schüll ik´t woll kriegen?“ Un as se jüs vür Romakers Schapstalldör sünd, seggt schnitjers Bur: “Du schast denn Deubel kriegen!“ Da har he´n kaputten Grapen in de Hand, un dat Gold wör weg; dat Gössel wör ok verschwunnen.
Naher hett keen een dat Gold woller to sehn kregen, un nu is de Kuhl al lang tosmeten.
(Quelle: 1979 – Sagen aus dem Lande zwischen Niederelbe und Niederweser; J.F. Zeller, Zeven)
Auf der gleichnamigen DVD von Rainer Bassen erklärt Jokers Lisa den plattdeutschen Begriff »Ünner´e Ösch“ und erzählt eine Kurzfassung der Geschichte von der Goldkuhle
*) siehe auch »Nr. 158 – Liste de Flurnamen«
**) Ohlenbostel : ehemalige Schäferei zwischen Bartelsdorf und dem „Kleinen Loh“ gelegen